Kisdorfer Sozialdemokraten informieren



Dat leeve Geld

Wi könnt dat nu nich mehr uutholn, wi mött juch dat mal verklorn, wat dat mit den Gemeindehuushalt op sik hett. Dor is nämlich so veel Kreihenschiet över schreben und seggt worn, dat wi juch mal een beeten wat över Betriebswirtschaft vertelln wöllt. Also, so een Huushalt besteiht ut mehrere Deele. Wichtig sind:

1. De Verwaltungshuushalt

In den Verwaltungshuushalt kommt alle Innahmen und Uutgaben vun de Gemeinde in eenen Pott. Dat Ziel is eene schöne schwatte Null. Je schwatter desto beeter. Sind de Innahmen gröter als de Uutgaben, denn hebbt wi eenen Överschuss. Düsse Överschuss kümmt rin in den Vermögenshuushalt.

2. De Vermögenshuushalt

Uut den Vermögenshuushalt ward Geld investiert und wat Needes (ton Bispill Kinnergorn-Anbu, Grundstück för den Sportvereen usw,) anschafft. Wenn darnah immer noch wat över is, ward ut düssen restlichen Överschuss de Rücklagen maakt, und de packt man op een Sporbook.

Wenn nu aber de Överschüsse ut den Verwaltungshuushalt nich langt, üm de Investitionen to betahln, ja denn - mutt man wat vun de Rücklagen nemm. Man - bi so'n Sporbook schall man nur in'n Nootfall dat Konto övertrecken.
Dat is in eene Gemeinde genauso wie in eenen privaten Huushalt.

Aber wenn man sik hüüt nich längerfristig binden deiht - wi meent, wenn man hüüt keen Dack op sien Huus deckt und dat rinnregen lett, denn, ja denn mutt de Nahfolger ran. Ünner Ümständen doppelt so dull, weil ja de Schaden gröter warrn kann, und de Prise fallt selten. Dat nennt man denn Generationsgerechtigkeit.

Op düsse Art versökt wi för de Gemeinde to handeln. Und wi glöövt, dor liegt wi richtig.